Yn Barod i Ymateb Bob Amser

Mae hyfforddiant wrth wraidd popeth a wnawn.  Mae pob aelod o’r tîm gweithredol yn dilyn hyfforddiant yn rheolaidd â’r nod o gynnal eu sgiliau, dysgu technegau newydd a sicrhau eu medrusrwydd.

Mae pob aelod yn cadw llyfr log personol i gofnodi eu sgiliau craidd a chymwysterau arbenigol drwy system hyfforddi TIER (sef Training, Incidents, Equipment and Reporting yn Saesneg).  Mae’r gronfa ddata genedlaethol hon sydd wedi’i dylunio ar gyfer y gwasanaethau brys yn ein helpu i gadw golwg ar gymwyseddau, cynllunio sesiynau a chofnodi’r holl weithgareddau datblygu proffesiynol parhaus (DPP) a gyflawnir.  Yn ogystal, bydd pob aelod o’r tîm yn cwblhau prawf medrusrwydd a ffitrwydd blynyddol i gadarnhau eu bod yn addas i gyflawni gweithgareddau achub gweithredol.

Safonau Cenedlaethol, Ffocws Lleol

Mae ein rhaglen hyfforddiant yn dilyn canllawiau sefydliad Mountain Rescue England & Wales (MREW) sydd wedi’i haddasu i gyd-fynd â heriau penodol ein hamgylchedd lleol.

Mae Bannau Brycheiniog a’r ardaloedd cyfagos yn cynnig ystod eang o diroedd - o fynyddoedd geirwon ac afonydd i goedwigoedd a gwastadeddau gwledig. Yn fwy a mwy, rydyn ni’n cael ein galw nid yn unig i ardaloedd mynyddig ond i chwilio mewn amgylcheddau trefol, achub pobl o ddŵr, chwilio am unigolion sydd ar goll a chymryd rhan mewn gweithrediadau mewn cysylltiad â llifogydd. Mae pob aelod sy’n gweithio ar y bryniau wedi’i hyfforddi i gyflawni pob math o weithgareddau chwilio ac achub, tra bod rhai yn mynd ymlaen i ddatblygu sgiliau uwch mewn rolau arbenigol. 

Rolau a Modiwlau Arbenigol

•          Rydyn ni’n sicrhau bod ein galluoedd gweithredol yn cwmpasu mwy na 180 o fodiwlau hyfforddi arbenigol, gyda phob un ohonynt yn canolbwyntio ar sgil neu rôl benodol o fewn y tîm.

•          Mae’r rhain yn cynnwys:

•          Arweinydd Grŵp

•          Rheolwr Chwiliadau

•          Aelod Cymorth Gweithredol

•          Technegydd Achub o Ddŵr Modiwl 2 neu 3 DEFRA

•          Rheolwr Digwyddiadau Dŵr Modiwl 5 DEFRA

•          Aelod Tîm Chwiliadau sy’n cynnwys Canŵ neu Gaiac

•          Technegydd Meddygol Achubiadau Anghysbell

•          Gyrrwr Cerbyd oddi ar y Ffordd

•          Gweithredwr Drôn

•          Gyrrwr Ymatebiadau Golau Glas

Mae system TIER yn ein helpu i fonitro’r modiwlau hyn a threfnu cyrsiau gloywi pan fo angen i aelodau ddiweddaru eu cymwysterau neu ail-sefyll profion.  Mae hyn yn sicrhau bod pob gwirfoddolwr yn meddu ar y sgiliau diweddaraf i’w alluogi i gyflawni ei rôl.

Sesiynau Hyfforddi

Cynhelir sesiynau hyfforddi ar nosweithiau Mercher ac ar y dydd Sul cyntaf bob mis.  Mae’r sesiynau’n cyfuno sesiynau dysgu mewn ystafell ddosbarth, gwaith maes ymarferol ac ymarferion yn seiliedig ar senarios er mwyn creu ymdeimlad o waith achub go iawn. 

Yn ogystal â’r hyfforddiant gweithredol, disgwylir i aelodau fynychu cyrsiau arbenigol a digwyddiadau codi arian drwy gydol y flwyddyn - o seminarau technegol a diweddariadau meddygol i weithdai rheoli chwiliadau.